Ondoko lerroetan Goierriko eta Tolosaldeko hegoaldeko hizkeren azterketa dialektologikoa egin nahi dugu, azken mendeotan batu diren datuetan eta guk geuk bildu ditugunetan oinarrituta. Gure helburua ez da deskribapen zabal bat egitea, bitxikeria eta xehetasun guztiak bilduta alderdi horretako hizkerak nolakoak diren erakusteko. Helburu kontrastiboa dugu, hizkera horiek inguruko hizkeren artean duten kokagunea aztertu nahi dugulako. Gauzak horrela, balio dialektologikoa duten bilakabideak dira bereziki interesatu zaizkigunak, Goierriko eta Tolosaldeko hizkerak aldameneko hizkeretatik bereizteko edo eurekin batzeko balio dutenak, alegia. Hala, bada, Goierriko eta Tolosaldeko hizkeren artean dauden kidetasunei eta ezberdintasunei erreparatu diegu. Orain arte erabili izan den sailkapena berrikusteko asmoz (cf. Bonaparte 1863), gipuzkeraren iparraldeko eta hegoaldeko azpieuskalkien arteko mugari arreta berezia egin diogu. Eta bi alderdi horien bereizgarritzat jotzen diren bilakabideak aztergai dugun eremu dialektalean nola banatzen diren aztertu dugu.

Horretaz gain, aztergai ditugun hizkeretatik alboko herrien hizkeretara dagoen aldea aintzat hartu dugu. Izan ere, alderdi asko jartzen dira harremanetan, eta, beraz, beste alderdietako hizkuntza-ezaugarriek eragina izan dezakete gure eremuan: hain zuen, Beterrin, Nafarroako Leitzan eta Araitz haranean, Urolaldean edo Deba ibarrean nagusi diren bilakabideak. Oro har, bilakabide batzuen hedadura eta egoera zehaztu nahi izan dugu. Beraz, orain arte ikerlariek erakutsitako datuak kontrastatu ditugu, isoglosek atzera edo aurrera egin ote duten jakiteko. Ildo beretik, aztergai dugun alderdian erdialdeko eta mendebaleko euskalkietan ageri diren berrikuntzak nola eta noraino hedatu diren aztertu nahi izan dugu.